देहाची तिजोरी, भक्तीचाच ठेवा - Dehachi Tijori Bhaktichach Theva

देहाची तिजोरी, भक्तीचाच ठेवा |
उघड दार देवा आता उघड दार देवा || धृ ||

पिते दूध डोळे मिटूनी जात मांजराची |
मनी चोरट्याच्या का रे भिती चांदण्यांची |
सरावल्या हातांनाही कंप का सुटावा || १ ||

उजेडात होते पुण्य, अंधारात पाप |
ज्याचे त्याचे हाती आहे कर्तव्याचे माप |
दुष्ट दुर्जनांची कैसी घडे लोक सेवा || २ ||

स्वार्थ जणू भिंतीवरचा आरसा बिलोरी |
आपुलीच प्रतिमा होते आपुलीच वैरी |
घडोघडी अपराध्यांचा तोल सावरावा || ३ ||

तुझ्या हाती पांडुरंगा तिजोरी फुटावी |
मुक्तपणे भक्ती माझी तुझी तू लुटावी |
मार्ग तुझ्या राऊळाचा मला आकळावा || ४ ||

भलेपणासाठी कोणी बुरेपणा केला |
बंधनात असुनी वेडा जगी मुक्त झाला |
आपुल्याच सौख्यालागी करील तो हेवा || ५ ||


Dehachi Tijori Bhaktichach Theva
Ughad Dar Deva Aata Ughad Dar Deva